زوج رحمة أحمد: نجاحها في «الكبير أوي» نجاح ليا.. وزوجته تغازله على الهواء

فاجأ أحمد منصور زوج الفنانة الشابة رحمة أحمد الشهيرة بـ"مربوحة" في مسلسل "الكبير أوي 6" الذي عرض في شهر رمضان المنقضى على الهواء.

وقال زوج رحمة أحمد: "لما جالها الدور مع أحمد مكي كنا في فترة مهمة في حياتنا عشان طفلنا اللي لسه مولود واحتمالية السفر وقتها وبالتالي لما اتعرض عليها الدور في مسلسل "الكبير أوي" كان تحدي كبير لينا خاصة أنها كانت في مسئولية كبيرة في المنزل وبالأخص ابننا وشالت اللي محدش يقدر يشيله".

وتابع: "بس لما اتعرض عليها الدور كنت داعم جدا ليها وقلت لها خديه لأن الفرصة دي مش هتكرر في حياة أي حد وبتيجي مرة واحدة في العمر ومفكرتش وقتها في إيجابيات وسلبيات لأن مسلسل الكبير عمل ميترفضش".

واستطرد: "واتعرض عليها الدور لما كان عندها مسرحية في الأوبرا وأنا كنت في البيت قاعد بابننا ومشغل أغاني عشان يسكت وكنت عمال أقولها هتيجي امتى".

واستكمل: "لما وصلت بدأنا الخناقة عشان قاعد لوحدي بابننا بس لما قالتلي أحمد مكي زارني في المسرح وتقريبا فيه ترشيح للدور وقتها نسيت الخناق وكل حاجة وقعدنا نفكر وقتها وكمان قررنا إلغاء السفر وقولتلها ركزي في شغلك وأنا هعرف اظبط نفسي وسافرت أنا وقررت أنها تعيش في مصر ووالدتي وحماتي يرعوا الولد".

وأردف: "رحمة بتحاول في البيت تعمل أي حاجة حتى لو مش عارفاها بتفضل تحاول لحد ما تعملها ولما اتجوزتها ماكنتش إمكانياتها في الطبخ بنسبة 100%  لكنها أصرت وتعلمت".

وعن أسوأ الأكلات التي تقوم بعملها قال: "المكرونة البشاميل".

وغازلت رحمة أحمد زوجها ممازحة على الهواء بقولها: "يا كلوب العتمة"، وجاء ذلك خلال اتصال هاتفي عبر برنامج "كلمة أخيرة" مع الإعلامية لميس الحديدي على شاشة ON.

وكانت رحمة أحمد قد شاركت في الماراثون الرمضاني بدور مربوحة في مسلسل "الكبير أوي 6" وهو من بطولة أحمد مكي، رحمة أحمد، محمد سلام، بيومي فؤاد، هشام إسماعيل، سما إبراهيم، محمد أوتاكا، ليلى عز العرب، مصطفى غريب، حسن القناوى، علاء زينهم، حسين أبو حجاج وضيوف الشرف ماجد الكدوانى، حمدى الميرغنى، نرمين الفقى، وأسماء جلال، وسليمان عيد وآخرين وتأليف مصطفى صقر إخراج أحمد الجندى.