تامر فرج يدعو لعدم الانسياق وراء الترندات

خرج الفنان تامر فرج ليتفاعل مع موجة التريندات التي اجتاحت مواقع التواصل الاجتماعي مؤخرًا، وذلك عبر منشور نشره على حسابه الرسمي بموقع "فيسبوك".

وكتب تامر فرج قائلاً:

"عاجل أصدقائى الأعزاء احب اطمنكم عليا بالنسبة للى حصل الفترة اللى فاتت، انا ما كتبتش تعليق او رأى او بوست عن اللى حصل من كابتن حسام حسن، ولا عن اللى بيحصل فى مراسى، ولا عن المحامية اللى دبحت والدتها، ولا عن الست اللى قفشت جوزها و جوز اخته مع ستات فى جنينة، ولا كتبت أى حاجة بخصوص أى تريند ظهر الفترة اللى فاتت على السوشال ميديا، و رغم كده احب اطمنكم أن أنا بصحة جيدة وأسرتى بخير، و لم نصاب بأى لعنات، أو أمراض، أو أوبئه و لم أتعرض للتنمر أو التشكيك فى وطنيتى أو فى قواى العقلية بأن حد يقول عليا "اللى مكتبش تعليق أهوه" مثلا أو والعياذ بالله حد يخوض فى عرضى و يقول "اللى معندوش بوستات أهوه" ولم أتعرض لإلغاء اشتراكى للأنترنت أو إلغاء بروفايلاتى على وسائل التواصل الاجتماعى بسبب لامؤاخذة ضعف المشاركة، أميتوا الترند بالسكوت عنه و عدم الخوض فيه و والله هتلاقوا حاجات كتير اتحسنت فى الحياة".

وجاء تعليق فرج في إطار ساخر، منتقدًا حالة الانسياق وراء التريندات، ومؤكدًا أن تجاهلها قد يكون الحل الأفضل لتفادي تضخيمها.