محمد الشرنوبي يكشف سبب غيابه 4 سنوات عن الغناء: كنت بدور على هويتي

كشف الفنان محمد الشرنوبي سبب ابتعاده عن عالم الموسيقى والغناء لمدة 4 سنوات، موضحًا أنه قضى هذه الفترة في البحث عن هويته الفنية والوصول إلى أسلوب موسيقي يميزه عن غيره، قبل طرح ألبومه الجديد «بعد الليل».

وقال محمد الشرنوبي، خلال لقائه ببرنامج «تفاعلكم»: «كنت حاسس إني ضايع ومش لاقي نفسي ومش عارف ألاقي حاجة تكون مختلفة محدش بيقدمها غيري، وده كان شاغلني».

وأوضح أن بحثه عن هوية فنية خاصة جاء متأثرًا بتجارب كبار نجوم الموسيقى، قائلًا: «لما نبص على الأساطير اللي في التاريخ كان دايمًا عندهم هوية وحاجة بتميزهم عن غيرهم، ولو حد قلدها هيقولوا ده بيقلد، وكنت ضايع في الحتة دي».

محمد الشرنوبي: عملت استوديو صغير وبدأت أتعلم صناعة الموسيقى

وأشار الشرنوبي إلى أنه قرر خلال فترة غيابه أن يتعلم تفاصيل صناعة الموسيقى بنفسه، مؤكدًا أن الوصول إلى هوية فنية واضحة يحتاج إلى فهم جوانب العمل الموسيقي المختلفة.

وقال: «كل حد بيلاقي هويته لازم يبقى فاهم صناعة المزيكا وإزاي يصنع أغنية، عملت استوديو صغير وابتديت أتعلم من الأول خالص إزاي أعمل أغنية، إزاي أطلع ميكس وماستر بطريقة معينة عشان أطلع صوت مختلف عن الموجود في السوق».

وكشف أنه قضى السنوات الأربع في العمل والتجربة بعيدًا عن الأضواء، موضحًا: «الرحلة ابتدت من 4 سنين، قعدت قافل على نفسي وطلعت حوالي 250 تراك، وكنت فاتح ورش كتير مع ناس كتير، وكنت ببحث عن هويتي، ده بكل بساطة اللي حصل في الأربع سنين».

محمد الشرنوبي يكشف ملامح هويته الفنية الجديدة

وعن النتيجة التي توصل إليها بعد هذه الرحلة، قال محمد الشرنوبي إن هويته الموسيقية الجديدة تجمع بين الطابع الشرقي والثقافة المصرية والأسلوب العصري.

وأوضح: «هويتي الجديدة هي هوية معاصرة بطابع شرقي بثقافة مصرية وعصرية جدًا، شبه اللي بيحصل في السوق العالمي، ده اللي وصلتله وأظن باين في الألبوم».

وأضاف: «أنا مزيكتي خفيفة جدًا، بس في الآخر بغني وعندي ثقافة مصرية بعتز بيها جدًا».

وكان محمد الشرنوبي قد طرح أحدث ألبوماته الغنائية بعنوان «بعد الليل»، بعد فترة من الغياب ركز خلالها على تطوير تجربته الموسيقية والوصول إلى هوية فنية جديدة.