«عايش ومش عايش» .. مواطن بالدقهلية يكتشف وفاته منذ «3» سنوات بالصدفة! (فيديو)

في واقعة غريبة من نوعها .. كشف الإعلامي "شريف عامر" على الهواء في برنامجه "يحدث في مصر" الذي يعرض عبر فضائية "إم بي سي مصر" عن مشكلة صدور شهادة وفاة لأحد المواطنين، بالرغم من أنه مازال على قيد الحياة.

وأوضح صاحب المشكلة طه الإمام الشافعي قائلا:" أنا عندى 62 سنة والدولة معتبراني ميت من 3 سنين، مضيفًا: "أنا اكتشفت أمر وفاتي لما توقفت بطاقة التموين الخاصة بيا ورحت أسال عن السبب معرفتش وبعدين روحت عشان انتخب قالوا لي صاحب الرقم القومي متوفي".

وأضاف: "أنا تابع لسجل المدني بالمنزلة في محافظة الدقهلية، وروحت عشان اتأكد ولقيت نفسي ميت .. لقيت أني متوفي في بورسعيد من 3 سنين".

واستطرد: "كل حاجة وقفت تمويني واقف ومعرفتش أخد لقاح كورونا عشان أنا قدام الناس ميت، وجميع المصالح الحكومية معترفة بشهادة الوفاة ومش معترفة بيا وأنا عايش، وبجري حاليًا على إعادة القيد لأني لو اتوفيت دلوقتي هتدفن ازاي؟!".

وواصل حديثه: "أنا ماشي بشهادة وفاتي وببطاقة هتنتهي الشهر الجاي". 

وأكد: "طلعت بلاغ وفاة عشان أصلح الغلط وجابولي بلاغ الوفاة ومرفق فيه صورة البطاقة بتاعتي منين منعرفش، حد عامل بلاغ وفاة بنفس صورة بطاقتي في محضر رسمي بمحكمة بورسعيد، وأنا مليش علاقة ببورسعيد ولا أي معارف فيها، وبطاقتي مذكور في المحضر أن بطاقتي كانت مع الشخص دا لتخليص مشكلة ميراث لديه وهو الوحيد اللي أخد صورة بطاقتي".

وناشد "الشافعي"، المسؤولين بمساعدته وحل مشكلته في نهاية حديثه قائلا: "بقالي 16 شهر بجري عشان أعمل إعادة قيد وبطاقة شخصية أمشي بيها، روحت المنزلة والأحوال المدنية في العباسية وبعد شهرين قالولي مشكلتك في بورسعيد مش عندنا، مضيفًا: "وروحت لوزارة الصحة في بورسعيد حلفولي إنهم مش هيعملوا إعادة قيد إلا بجواب من المحكمة، ومعرفش ايه دخل المحكمة بإعادة قيد".