بسمة تكشف تفاصيل تعرضها لواقعتي تحرش: «كنت هموت»

كشفت الفنانة بسمة عن تفاصيل تعرضها لواقعتي تحرش في أحد التجمعات وهي في عمر الـ 12 عام، مع الإعلاميتين سهير جودة ومفيدة شيحة، في برنامج "الستات" عبر فضائية "النهار".

وأوضحت بسمة بقولها: "مبحبش أتكلم في تفاصيل الحوادث دي لأنها بتوجع .. وربنا ستر .. ومبلغتش لأن ده حصل من ناس معرفهاش".

تابعت: "أول مرة في ناس عرفوا يعدوني من وسط التجمع ده لحد ما دخلت مكان مقفول، وتاني مرة كانت حادثة كبيرة، ربنا خلى واحد ابن حلال يقفلي، وعرف في الآخر أنه ينقذني من وسط الواقعة ويحطني في عربية".

استطردت: "حاولت أصوت لكن الحادثة كانت أكبر من أني أعرف أتصرف معاها، لدرجة أني في لحظة وقعت على الأرض وكان في أكتر من 100 قدم فوقيا، مضيفة: "في اللحظة دي قولت أنا هموت خلاص، الموضوع عدى التحرش، مبحبش أفتكر التفاصيل".

اختتمت بسمة حديثها قائلة: "بعد الواقعتين دول في حد حاول يمد إيده عليا فقدرت أمسك إيده وألطشه بالقلم .. الواحدة في اللحظات دي بتبقى حاسة إنها قليلة الحيلة ونفسها أي حد ينجدها، مشيرة إلي: "وأكتر إحساس بيقتل لما عينك تيجي في عين حد وأنتي بتستغيثي وميعبركيش".

يذكر أن آخر أعمال بسمة، حكاية "واللي ما يشتري يتفرج" من مسلسل "نصيبي وقسمتك"، إخراج عصام نصار، مع النجوم: إيهاب فهمي، محمد علي رزق، وهبة عبدالغني، وندى عادل، وصبري عبدالمنعم وغيرهم.