الفنانة دينا: «الرقص أكبر حب في حياتي»
كتب: مؤمن نصر
روت الفنانة دينا مواقف محرجة تعرضت لها أثناء قيامها بالرقص، وسقوطها قائلة: "بعض الوقعات بتبقى تلقائية وصدفة لكن بعض منها بيبقى مقصود.. فذات مرة زمان واحدة كعبلتني عن قصد ورجعلتها قلتلها ليه؟.. هتستفيدي إيه؟.. قالت بهزر".
روت مواقف أخرى خلال لقاءها بأحدى البرامج التلفزيونية: "مرة اتكعبلت في سلك فيديو وطرت وأنا بطبعي بقع وبقوم حتى لو موجوعة من شدة إحراجي لاني بتكسف اوي من السقوط لازم أقوم واكمل الفقرة، المهم لما اقع وأنا برقص اقوم عشان لازم اقف وأكمل وبعد إنتهاء الفقرة كنت ببدأ أكتشف الالام وتورمات وكدمات واصعب الإصابات كنت عندما إنزلقت وأصبت بتمزق أربطة القدم وكنت بحط مسكن وبكمل لأن فيه ناس بتبقى منتظراني في ليلة العمر هتعب ساعة بس ماضيعش فرحة يوم العمر لاي بني أدم".
أكملت: "أنا بعشق الرقص وهو أكبر حب في حياتي لكن لايفوق حبي لابني علي، ورغم كل المسيرة دي بس لسه بخاف من مواجهة الجمهور وبعمله حساب وببقى قلقانة لسه وانا بطلع المسرح قبل ماشتري اي فستان وعاوزة أعرف راي الناس والرقص هو حياتي وبستمتع طول الوقت بالرقص وعشان كده بدرب رقص دلوقتي عشان أفضل أرقص لما تغيب الاضواء".
عن نظامها الغذائي وسر رشاقتها ولياقتها، قالت: " بقالي ثلاث أو أربع أيام بجرب نظام جديد وهي أني أوقف كل العيش والالبان والفراخ والبيض وأكل بس سمك ولحمة وعيش الردة ومربة وشوكلاته وأيس كريم بس مش باكل التورت ولا الجاتوه وباكل الجبن المطبوخة لكن الرومي منعناها".
