الإعلامي ممدوح موسى لـ«العاصمة»: مافيش فنان ظهر معايا خد مني «جنيه».. عمرو دياب وعادل إمام صوروا ببلاش

كشف الإعلامي ممدوح موسى عن سر الهجوم عليه في بداية مشواره الإعلامي، مشيرًا إلى أنه ركز على نجاحه واجتهاده في عمله ولم يلتفت لذلك، وجاء ذلك خلال استضافته في ندوة صحفية في موقع "العاصمة" برئاسة الكاتب الصحفي الكبير أيمن نور الدين.

وفي البداية، قال "موسى": "أنا دخلت في حاجة مش فاهمها، والعمل بالتليفزيون والإنتاج مكنش في مخططاتي من البداية، أنا من عيلة بسيطة جدا ووالدي كان قبطان وهاجرنا من السويس ومكنش معانا حاجة وكنا بناخد إعانة من الحكومة، وعمرو دياب كان مهاجر زايي".

وتابع: "بعد التخرج اشتغلت في أحد الفنادق لمدة سنتين في العلاقات العامة، وبعد كده في تجارة السيارات وأيضًا في شركة للإنتاج الفني، لحد ما عملت برنامج "سر التفوق".

وعن بداية مشواره الإعلامي، أوضح: "كنت بذيع في التلفزيون المصري ومكنش فيه قنوات زي دلوقت، فمصر كلها كان بتشوفني بعد الفطار، فجأة لقيت نفسي عامل قلق والناس عرفتني بشكل كبير، وحصل هجوم كبير من الصحافة مرة واحدة وأنا مكنش في بالي كل ده كل اللي في دماغي إني أجتهد وأصور".

أما عن سر حب النجوم له وظهورهم معه في برامجه أضاف: "عندي أسرار كتير لمعظم نجوم الوطن العربي، من أول الفنان عادل إمام لحد المطرب شعبان عبد الرحيم، مرورًا بالهضبة عمرو دياب والفنانات إليسا ونانسي عجرم ولطيفة وهيفاء وهبي ويسرا، لأن فيه ثقة وأمانة في التعامل بينا وكنت بهتم بحاجات مش بتاعتي كمذيع أو كمنتج للبرامج بتاعتي".

واستطرد: "أنا أظهرت الجانب الإنساني في حياة عمرو دياب، أنا كنت بصور تفاصيل محدش عمل زيها، يعني وهو بيلعب رياضة، ودايما بيحط مصحف في جيبه، الحاجات اللي عملتها ضافت لعمرو دياب، عشان كده هو سماني نبض الشارع، لأني عارف الناس بتحب إيه".
 
واستكمل: "أنا كنت معد ومنتج ومخرج وصاحب رؤية برامجي، ومافيش فنان في العالم العربي خد مني "جنيه"، عمرو دياب وعادل إمام صوروا معايا ببلاش ومن غير ولا مليم، أنا بس كنت بدفع حق تصوير برامجي وسفري".

واختتم الإعلامي ممدوح موسى حديثه عن الفرق بين تحقيق النجاح حاليًا وفي الماضي قائلا: "كل وقت وله آدان، ولو كنت ظهرت دلوقت أكيد هحقق نفس النجاح وممكن الفكر كمان يتطور ودي موهبة".



إقرأ أيضًا: الإعلامي ممدوح موسى لـ«العاصمة»: عمرو مصطفى «مؤدي».. وعمرو دياب هو اللي عمله

وجدير بالذكر أن، الإعلامي ممدوح موسى، اشتهر ببرامجه الفنية المثيرة مع نجوم الغناء والتمثيل المصري والعربي، حيث بدأ مسيرته الفنية في فترة التسعينات وكان برنامج (سر التفوق) عام 1997 هو أول البرامج التي حقق شهرة من خلالها، لتتوالى برامجه بعد ذلك، والتي منها برنامج (أسرار النجوم) عام 2000 و(شارع النجوم) عام 2001.