ملحن «عيش بشوقك» يرد على اتهامات حمادة هلال له: «الكداب بيروح النار.. وتامر حسني مش ناقص أغاني»

خرج الملحن بلال سرور عن صمته ليرد على اتهامات الفنان حمادة هلال له بأنه باع أغنية "عيش بشوقك" للفنان تامر حسني بدلًا منه بعد تعبه فيها لمدة شهور.

وكتب "سرور" عبر حسابه بموقع "فيس بوك" منشوران للرد على حمادة هلال، جاء في الأول: "مرة فنان كلمناه أنا والشاعر مصطفى حسن، يجيلنا يجرب غنوة بصوته، الفنان ده جيه وغنى واتبسط، ثم اختفى 6 شهور مبيردش حتى على تليفون، فالأغنية راحت لصاحب نصيبها، يقوم الفنان الأولاني يبدأ يطالب بأحقيته في الغنوة دي ويدعي إنها أغنيته وإنه تعب فيها!! الكداب بيروح النار".

وبعدها كتب الملحن في منشور طويل روي فيه تفاصيل الأزمة بقوله: "بمناسبة وصول #عيش_بشوقك ١٣٠ مليون وعشان جالي كذا تعليق متضايقين من طريقة تعليقي على اللي قالوا الفنان حماده هلال فأنا بعتذر أولا .. ثانيا إسمحولي أرد.. صديقي الفنان مصطفي حسن كلم حمادة هلال وطلب منه يجيلنا يجرب صوته على غنوة مهمة والفنان حمادة جالنا وجرب الأغنية وعجبته وكان يوم جميل وكله تمام".

وتابع: لفترة كبيرة أنا مش فاكر هيا قد إيه كنا بنحاول نكلم حمادة ونبعتله رسايل ومفيش أي نوع رد منه لا بالسلب ولا بالإيجاب بيروح أفراحه وشغله عادي وحفلاته وبيسافر ويرجع وبرضه مبيردش، بيقابل فنانين وبيسمع أغاني تانية عندهم وبرضه مبيرجعلناش يقولنا ناوي يعمل ايه".

وأضاف: "بعد ما صلينا استخارة سمعنا الأغنية لصديقنا المنتج هاني محروس اللي كان بيحضر أنه ينتج أغنية للفنان تامر حسني فالتوقيت ده واتفقنا أن الأغنية يغنيها تامر حسني وبرضه حمادة مش ظاهر فالصورة".

واستطرد: "الغنوة سجلناها وبدا تامر تصويرها، هنا ظهر الفنان حمادة، وبدا يكلم مصطفي حسن يلا أنا جبت منتج للأغنية تعالوا ننفذها وهو هيحاسبكوا، الفكرة بالنسبة للفنان حمادة أنه مكنش عايز يشتري الأغنيه هو كان راكنها وبيدور على حد يشتريها، احنا طبعا اتصدمنا وفهمناه أن الأغنية اتباعت، طبعا هو كان متضايق جدا بس ده فشغلنا شئ طول الوقت وارد لأن أنت ملتزمتش معانا بحاجة !!!! ولا حتي بتقدير أنك تتواصل معانا .. حمادة اتضايق جدا وبقي بيطلب مننا بأي شكل نرجع الغنوة وأن المنتج هيديكوا اللي أنتوا عايزينه".

واستكمل الملحن قائلا: "احنا طبعا كنا التزمنا مع هاني محروس والفنان تامر حسني.. وأنا بقسم بالله ومش محتاج احلف أني من كتر ما صعب عليا حمادة فكرت أنا ومصطفي نستاذن تامر ونرجعله الأغنية، فالتوقيت ده الفنان حماده هلال كلم الفنان تامر حسني، وطلب منه الأغنية وافترا علينا وقاله أنها معمولة على ايدي وشقيت فيها طبعا ده محصلش، ومش منطقي أصلا أنه يحصل.. بس هو قال كده عشان يأثر على تامر، وبالفعل الفنان تامر حسني كلمني وقالي هو اللي بيقولوا حمادة ده صح أنا طبعا ركبني عفريت، وفهمته القصة وخلص الموضوع، واعتذرنا لحمادة وكل الدنيا غلطته".

وواصل: "ولما الغنوة نزلت ونجحت بقيت كل ما اقابل حد لمدة شهور يقولي ليه عملتوا كدة مع حمادة، اروح مفهمه القصة كإني متهم، وكل الناس اللي فالوسط عارفين الموضوع ده.. وعارفين أن حمادة مش صاحب حق، دلوقتي بعد ما عدي سنين الموضوع اتفتح، وناس عمالة تبعتلي كلاك غريب وأنتوا ازاي تعملوا معرفش ايه !!!!! الجمهور والفانز أنتوا فوق رأسنا كلنا واحد واحد، بس مش معني أنك بتحب فنان أنك تصدق وخلاص وتتهم فنان تاني بحاجات مش حقيقية.. الفنان الكبير تامر حسني بره القصه دي تمامًا، وهو مش ناقص أغاني عشان ياخد حاجة مش بتاعته الغنوة دي غنوة تامر حسني وأنا فخور أنها فتاريخه وفمشواري".

ووجه الملحن بلال سرور في ختام حديثه للفنان حمادة هلال قائلا: "ولو كنا جينا عليك يا حمادة مكنش ربنا كرمنا فيها .. وأنت لو صاحب حق مش هتطلع تقول كدة على فنان ونجم كبير أنت عارف أنه بره القصة".

وفي سياق متصل، حل حمادة هلال كضيف مع الإعلامية أسما إبراهيم في برنامج «حبر سري» عبر شاشة قناة القاهرة والناس، وتحدث بشأن أن أغنية «عيش بشوقك» كانت له في بداية الأمر والذي عمل على تحضيراتها حوالي 6 أشهر، ولكن انشغل في مرض والدته فترة وعندما عاد بقوة لعمله، وجد أن تلك الأغنية ذهبت إلى النجم تامر حسني، وأوضح قائلا: "اتفاجأت أن الأغنية راحت في حتة تانية.. كلمتهم قلتلهم يا جماعة دي غنوتي حقي وبتاعتي ودا حرام.. وتنازل اللسان دا حاجة كبيرة".

وتابع: "أنا كان ممكن أزعل اللي عملها وأطلع تاني يوم على السوشيال ميديا بس قولت ليه هعمل كده، يمكن لو عملت كده وحرقت دمهم ممكن ربنا يحرق دمي، كان المفروض يبقى في تنازل بس الحمد لله، لكن على ايه.. ربنا عوضني بعدها على طول بأغنية اشرب شاي وكسرت الدنيا وبقت غنوة وإعلان وأنا مش فارق معايا الغنوة".