فاروق فلوكس: غضبت من فؤاد المهندس لأنه رفض إعطائي راتبي عن إحدى المسرحيات
كتب: مؤمن نصر
كشف الفنان فاروق فلوكس لأول مرة عن موقف جمعه مع الفنان الراحل فؤاد المهندس، مشيرًا إلي أنه أغضبه كثيرًا.
وقال فلوكس: "فؤاد المهندس ده حالة خاصة بالنسبالي لغاية ما توفاه الله كنت بحبه رغم المواقف الكتير اللي عملها معايا مش حلوة".
وأضاف: "مواقف كتير بس أنا هقولك واحد منهم، كنت بشتغل في فرقة الريحاني بعمل رواية وبمثل بقالي سنتين الرواية والدنيا حلوة قوي".
وتابع: "جه قالي أنا هعمل رواية أنا وأنت وعوض وشويكار، وقالي خلص روايتك آخر أغسطس و 1 سبتمبر هتكون معايا".
واستكمل: "قولتله ازاي أسيب المسرحية دي؟ قالي هو كده أنا أستاذك وبقولك، وسيبت مسرح الريحاني وروحت عنده بناء على إتفاق إن أجري هيكون رقم معين".
واستطرد: "بعدها المؤلف تقاعس ومعملش الرواية أنا ماليش ذنب، أنت شيلتني من الفرقة وحاطتني عندك يبقى تديني مرتبي".
واختتم فاروق فلوكس حديثه قائلا: "إداني شهر واحد بس والشهر التاني صلاح يسري كان قاعد بقوله فين أجري؟ إداني ضهره، مدرتش بنفسي بقى وقولت لأستاذ فؤاد قالي ماليش دعوة، وطبعا أي حد مكاني كان هيزعل زعل الدنيا"، وجاء ذلك خلال لقائه مع الإعلامية نانسي مجدي ببرنامج "القاهرة اليوم" المذاع عبر قناة اليوم.
ومن ناحية أخرى، كان الفنان الكبير فاروق فلوكس، قد قدم عدد كبير من الأدوار المميزة أبرزها دوره في فيلم "الراقصة والسياسي" بطولة النجمة نبيلة عبيد.
