ضربوه لحد ما اتأذى نفسيًا.. سيدة تشكو من حضانة في التجمع تهمل في الأطفال
كتب: رويدا حلفاوي
قامت سيدة تُدعى ندى بنشر صورة لطفلها على موقع تبادل الصور إنستجرام وكتبت عليها عبارات تشكو فيها من سوء معاملة ابنها الصغير من المسؤولين في حضانة في التجمع اسمها "تريليم"، وجاءت شكواها بعد تعرض ابنها لعملية ضرب متكررة.
وكتبت ندى على الصورة: "أنا بكتب الكلام ده وأول مرة في حياتي أكتب حاجة وحشة حصلت لي، بس عشان اللي حصل كان مع ابني في الحقيقة فأنا حاسة بغضب شديد ووجع لا أتمنى أن تمر به أي أم".
وتابعت: "أنا ابني اتعرض لأذى نفسي كبير في حضانة تريليم، والموضوع بدأ بإنه كان بيتعض جامد ومش مرة واحدة دا كتير وورا بعض من الأطفال اللي معاه في الفصل، وأنا ابني زي أطفال كتير لسه مبيعرفش يدافع عن نفسه أو يوقف اللي بيأذيه ويعضه، أنا ابني وصل بيه الحال إنه بيتعض من طفلة معدية وهو واقف في حاله ومبيعيطش هو واقف مصدوم مبيديش أي تعبير".
وأضافت ندى: "الموضوع دا بدأ يأثر نفسيًا على ابني بشكل كبير بعد ما كان حابب يروح الحضانة بقا بيعيط جامد ورافض إنه يخش الفصل وماسك فيا جامد، دا غير كمان إنه دايمًا منهار وبيصحى بليل يصرخ، إحنا بقالنا شهرين على نفس الحال وأنا بحاول أشتغل على نفسيته من خلال إني بتكلم معاه كتير وأعلمه إزاي يدافع عن نفسه".
وواصلت الأم: "آخر مرة وأنا بوصل ابني للحضانة عادي دخلت معاه لحد الفصل عشان أقنعه يدخل لقيت الطفلة قاعدة جوا والمدرسة بتحاول تقنع ابني يقعد معاها على نفس الترابيزة فجأة راح ابني بصلي وقالي يا مامي وقال اسم البنت عضت داوود هنا يا مامي".
وفي نهاية البوست قالت الأم: "المدرسة بصت للمدرسة التانية اللي معاها وأخدوني برا حاولو يلهوني سألتهم هي دي فعلًا البنت اللي عضت داوود؟ سكتوا واتوتروا فأنا فهمت إن هي دي اتخانقت معاهم وأخدت ابني ومشيت، المفروض إن الحضانة مينفعش تيجي على حق الأطفال ازاي الولد يتأذي نفسيًا وهو لسه في الحضانة أنا كنت فاكرة إنكم حضانة محترمة وصادقين في كلامكم وقلبكم على ابني زي ما بتقولوا".
