سعد فتحي: قعدت في «الرعاية» 15 يوم ومحدش وقف معايا غير النقابة
كتب: مؤمن نصر
كشف الفنان سعد فتحي، عن تعرضه لوعكية صحية خلال الفترة الماضية، معربة عن استيائه بسبب عدم سؤال أصدقائه عليه، بجانب توجيه الشكر للفنان مصطفى خاطر، بسبب مساندته له في أزمته الصحية.
وقال "فتحي"، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": أنا جت فترة تعبت ودخلت المستشفى قعدت في الرعاية حوالي 15 يوم، النقابة وقفت معايا وعلى رأسهم الدكتور أشرف زكي، وفي فنانين وشباب نجوم طالعة بتوع مسرح مصر ومنهم مصطفى خاطر، لما عرفوا جولي المستشفى وعرضوا حاجات مادية وكنت فرحان أن جيل زي ده وقفوا معايا، هما جيل جميل ومجتش من ناس تانية.
وتابع: المنتجين والمخرجين اللي هما معرفة، محدش سأل وزيي زي أي حد، لكن ربنا بعتلي شباب وعلى رأسهم مصطفى خاطر بالذات.
كما كشف الفنان فتحي سعد، عن مصدر دخله مؤكدًا أنه لا يمتلك أي عمل خاص غير الفن، موضحًا أن ابنائه يساعدونه في احتياجات المنزل.
واستطرد: أنا معنديش حاجة غير الفن والناس كلها عارفة كده، معنديش حاجة أملكها ولا حاجة اتسند عليها غير الفن، أنا بشتغل في مسرح الدولة، وأنا الحمد لله عندي أولادي كبار بيشتغلوا، ومش عيب أني أقول أن ولادي بيتحملوا جزء معايا من مصاريف البيت، وإذا كنت بعمل عمل مسرحي أو اتنين يبقى حاجة بتسند حاجة.
واستكمل: عايز أقول أني زعلان على نفسي، المنتجين والمخرجين عايزين إيه أكتر من أن الناس عارفة الفنان ومشهور، مقومات الفنان عندي ومش عارف أقول إيه.
وعن دخوله عالم التيك توك، فعلق سعد فتحي: لجأت لـ التيك توك علشان يكون في تواصل مع الناس وهل فكراني ولا لأ، الموضوع مكنش مادي، ولاقيت الناس من الدول العربية عارفاني وفكراني، ياريت المخرجين والمنتجين يعرفوا ويسمعوا الكلام ده.
اقرأ أيضاً: سعد فتحي عن عدم دعوته للمهرجانات: «هو لازم ألبس فستان عريان علشان يعزموني؟»
