بسمة: مش بخاف من تقديم دور أم لشاب كبير

أكدت الفنانة «بسمة» أنها لا تقلق من فكرة تقديم دور أم لشاب، وتحدثت عن مشاركتها في رمضان 2024 بمسلسل "مسار إجباري".

وقالت "بسمة" في تصريحات صحفية عن شخصية "نعنانة" في "مسار إجباري": "مكنتش عارفة حاجة عن المسلسل في البداية لكن كنت عايزة اشتغل مع نادين خان لأنها مخرجة شاطرة، وبدأت أعرف عن شخصية "نعناعة" إنها ست بسيطة وطيبة وفرفوشة روحها في ابنها وبتحب الحياة، وحدانية ومقطوعة من شجرة بعد موت أمها وأبوها في حادثة، هي ست لطيفة عيبها الأساسي إنها "عيوطة"، دي التركيبة اللي اشتغلت عليها قبل ما تتكتب الحلقات، من التفاصيل دي اشتغلت على الشخصية طريقتها في الكلام وشكلها الخارجي، كان في جزء من التحضير النفسي الشخصية دي لما تتعرض لموقف ما رد فعلها إيه، والمشترك بيني وبينها إحنا أمهات وعندنا قدر من التسامح".

وعن تقديمها دور أم لشاب قائلة: "المخرجة نادين خان من كام سنة كانت عايزين أعمل أم أحمد داش في مسلسل "أهل إسكندرية" لكن متعملش، أنا بحب أحمد داش وأعرفه من زمان وكنا زملاء مع بعض في أكتر من ورشة تمثيل وبحبه جدا، هو ممثل شاطر جدا ومجتهد والمشاهد اللي بينا كنا شغالين عليها على الأحاسيس قبل الكلام"

وتابعت: "وأنا بشوف أن دا تمثيل ومش هيلزق فيا في حياتي النهاردة أنا أم أحمد داش، من سنين كنت أم محمد الشرنوبي وقبلها بكام سنة كنت أم راندا البحيري اللي هي أصلا قدي، إحنا بنمثل واللي بيتفرج عليا عارف إننا بنضحك عليه ولو بنقدمه بحرفة هيوافق، ومش بيقلقني ولا يشغلني".

 اقرأ أيضا: «أتشرف بأعمالي».. أول تعليق من نهال عنبر على شائعة «اعتزالها الفن»