"الموت علينا كلنا حق".. تامر ضيائي يكشف عن وصيته بعد نجاته من الجلطة

كشف الفنان تامر ضيائى، عن وصيته لأهله وأصدقائه بعد مروره بأزمة صحية شديدة ونجاته من جلطة، حيث تحدث فى عدد من النقاط منها أن حضور الجنازة أهم من العزاء وغيرها.

وقال فى منشور له عبر "فيسبوك": "بوست وصية .. ده هيفضل باين على صفحتى لحد ما أموت.. الحقيقة اللى كلنا عارفينها ومتأكدين منها إننا كلنا ربنا كتبلنا إننا نموت فى ميعاد محدد غير معروف، وعشان كده كتبت الكلام ده لأنى محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفه، ووقتها طبعا مش هعرف أقولها لحد".

وصية تامر ضيائى

أما عن وصيته فحددها فى نقاط، قائلا: "ودى وصيتى"، وجاءت كما يلى:

1 ـ  صلاة الجنازة أهم من العزا وهى اللى كل ما العدد زاد كل ما ثوابى ما كان أكتر، فأرجوكم تصلوا عليا.

2 ـ مش شرط تيجى العزا وياريت لو اتعمل فى البيت أو مكان بسيط بفلوسه تطلعولى صدقة جارية أفضل.

3 ـ  من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وادعولى الوقت اللى هتقروا فيه جزء فضوا نفسكم وإقعدوا إدعوا فيه.

4 ـ بلاش صدقة جارية تقليدية وسهله ومش مستفاد بيها يعنى المصاحف كتير فى مصر أوى وكل بيت فيه كتير فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى، أو دخول مياه لبيت غلابه أو بناء سقف لبيت فقراء، حاجات ناس تستفيد بيها لمدة طويلة.

5 ـ دى نقطة مهمه اوى بالنسبة ليا.. محدش يقول لحد بتعيط عليه لية، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجه بتقول إن العياط معناه عدم رضا بقضاء ربنا "وابيضت عيناه من الحزن فهو كظيم".

6 ـ أهم حاجة تانى هى الدعاء وبس والصدقة

7 ـ من فضلكم تكثفوا الدعاء وقت نزول القبر وتتصدقوا بأى حاجه بنية إن ربنا يجعل قبرى روضه من رياض الجنة، ويثبتنى عند السؤال لأن ده أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى.

8 ـ الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى.

9 ـ  اللى بيحبونى يدعولى كتير عشان لو مفيش حد يدعيلى.

10 ـ  ودى مهمة أوى أوى أوى عاوز الكل يسامحنى على أى حاجه عملتها فيه بقصد لو يدون قصد.

 اقرأ أيضا: رامي صبري: «بعد 20 بلوك و100 فضيحة بيقولك النهايات أخلاق»