تصريحات مثيرة من شيكابالا عن مواجهة الأهلي وموعد اعتزاله ونصيحته لمصطفى شوبير

تحدث قائد الزمالك محمود عبدالرازق شيكابالا مع الإعلامي إبراهيم فايق في برنامجه "الكورة مع فايق" عن عدد من القضايا الرياضية الخاصة بالأهلي والزمالك.

وقال شيكابالا: أتمنى إن ماتش الأهلي والزمالك في السوبر الأفريقي إيراداته تروح لأهلنا في غزة.. ده اللي نقدر نعمله ولو بالقليل. 

‏وأضاف: عجبني محمد الشناوي لما قال الإعلام والصحافة بيقولوا كذا وكذا .. عنده حق هو غلط في التعميم في الأول بس في الأصل صح .. لو حد قال على الشناوي حاجة وطلعت غلط هل هيطلع يعتذرله؟ لا مش هيعتذر .. وده بيحصل معايا برضه.

وأضاف: لازم الإعلام يكون له دور يرجع جمهور الأهلي والزمالك يرجعوا تاني زي بعض .. الأهلي والزمالك كبار جداً.

وحول ما بدر منه في نهائي الكأس مع جمهور الأهلي قال شيكابالا: أنا غلطت لما رديت على جمهور الأهلي في ماتش نهائي الكأس في السعودية ولما رجعت وفكرت لقيت نفسي غلطت.

وأكد شيكابالا في تصريحاته: احنا عايزين العدل.. اتوقفت في ماتش تسليم الدوري ورئيس اللعبة قال إني معملتش حاجة هل ده عدل؟ إمام عاشور لما ضرب وليد سليمان اتوقف 12 ماتش وحسين الشحات لما شتم الشيبي اتوقف ماتشين هل ده عدل.. الأهلي بياخد بطولات أفريقيا ليه؟ عشان معاه فلوس واحنا عايزين برضه الإسماعيلي يكسب بطولات بس فلوسهم قليلة.

وحول موعد اعتزاله قال شيكابالا: هلعب السنة اللي جاية وكفاية كده عليا هعتزل.. الوقت جيه ولازم أسلم الراية.

‏وعن علاقته بممدوح عباس قال شيكابالا: أنا بعشق ممدوح عباس لأنه بيساعد النادي من غير ما يقول في أي وقت.. كنت بشوف لاعيبة بتقول لرئيس نادي أنت بابا وأنت وأنت عشان يغيروا عقدهم.. وأنا مش هعمل كده.

وعن نهائي القرن بين الأهلي والزمالك قال شيكابالا: دي أصعب لحظة في مسيرتي.. احنا طول الماتش كنا أحسن من الأهلي في نهائي القرن.. بس خلصت بتفاصيل صغيرة زي أشرف بنشرقي محدش رجله في جول الأهلي الثاني.

‏وقال شيكابالا مع الإعلامي إبراهيم فايق: مكنتش متخيل إن إمام عاشور يروح الأهلي لأنه زملكاوي مجنون.. وفتوح مش هيروح الأهلي لأنه زملكاوي مجنون برضه بس مختلف عنه وهو ابن النادي، بس مقبلش إن إمام عاشور يرجع للزمالك.

وعن الفرق بين الأهلي والزمالك في مراسم التتويج قال شيكابالا: ليه حصل في تنظيم تسليم الدوري والسوبر الأفريقي كده مع الزمالك؟ وليه محصلش كده مع الأهلي في نهائي أفريقيا؟.

‏وعن لعبه للأهلي قال شيكابالا: روحت الأهلي لأن مين كان زمان هيدفع مليون يورو لـ باوك ؟ الزمالك مكنش عايزني .. أنا روحت النادي 5 مرات وقفلوا تليفوناتهم .. قولت للمهندس عدلي القيعي في مشكلة لو في ماتش أهلي وزمالك وجيه جول للزمالك هقوم أهيص للزمالك وهبطل فيها، روحت اتمرنت في الأهلي بليل بتيشيرت أبيض بس مكنش قصدي والله ولقيت نفسي مش قادر.

وعن علاقته مع حارس الأهلي مصطفى شوبير قال شيكابالا: قولت لمصطفى شوبير ميمشيش من الأهلي وهو أخويا الصغير وبعشقه .. قولتله هتتعلم من مين تاني وأنت معاك أحسن حارس في مصر محمد الشناوي.

‏وعن أزمة الشحات والشيبي قال شيكابالا عبر: اللي عمله حسين الشحات كان بسبب نرفزة ملعب زي ما احنا بنترفز عادي جدا.. حسين اعتذر ودي حاجة حلوة وبحترمها ولو الشيبي عايزني أروحله عشان نحل المشكلة معنديش مشكلة.

وعن تصريحات حسن شحاته عنه قال شيكابالا: تصريحات حسن شحاتة إني مكنتش بحب المعسكرات؟ إزاي طول الفترة دي مبروحش معسكرات؟ هي مرة واحدة بس قولتله أنا مش عايز أروح .. أنا مش حابب أروح المنتخب .. لأني لما كنت بروح بحس إني غريب لما بكون موجود .. ما أنا ممكن أقول كوارث بتحصل في المنتخب.