محمود سعد: جبت في الثانوية العامة 56% واشتغلت في الصحافة

وجه الإعلامي محمود سعد مجموعة نصائح لطلاب الثانوية العامة والآباء، تزامنا مع إعلان النتيجة، وذلك عبر فيديو له على حسابه الشخصي بموقع تبادل الصور والفيديوهات انستجرام.

وقال محمود سعد: جبت 56% وأحمد حلمي 50%، الثانوية العامة لا أول الطريق ولا آخره.. الثانوية العامة مش آخر الدنيا يا جماعة، وياما ناس جابوا مجاميع صغيرة وحققوا نجاحات كبيرة جدا، والأمثلة كتير وموجودة معانا.

وأضاف: ابنك لما يجيب مجموع صغير مش نهاية العالم، ولما مينجحش مش نهاية العالم.. أنا نجحت أنا وصحابي حوالي 20 واحد، الدولة عملت أوكازيون ونجحنا كلنا، واانا امتحنتها سنة واحدة، وغيري امتحنوها 3 و4 سنيين، ومع ذلك حققوا نجاحات كويسة جدا في حياتهم.

وتابع: كلنا عارفين أن المجاميع الكبيرة بتدخل كليات زي الطب والهندسة والاقتصاد والعلوم السياسية، وفي الآخر ممكن ميحققوش نجاحات أو يبقى أماكن متواضعة، وفي ناس تانية ممكن متنجحش في الثانوية أو متاخدهاش من الأساس وتحقق نجاح كبير، على سبيل المثال الشاب اللي عمل مشروع الفراخ السوداء.

وواصل: مش كل إنسان مؤهل إنه يكون متفوق في الدرجات، لا ممكن يكون متفوق في حاجات تانية كتير، وعلى سبيل المثال أنا جبت 56%، ودخلت كلية آداب قسم تاريخ، واشتغلت في الصحافة ومكنتش أعرف إني هنجح فيها.

وأكمل: بص على الممثلين ومجاميعهم في الثانوية، فمثلا أحمد حلمي جاب 50%، ومبقاش ممثل ناجح وبس، بل بقى ممثل مثقف وواعي، وغيره كتير.