نيللي كريم عن أول لقاء جمعها بـ فاتن حمامة: «سألتها الجرايد شتمتني اختارتيني ليه؟»
كتب: أمنية مدحت
كشفت الفنانة نيللي كريم، عن رأيها في فكرة الزواج والارتباط، وذلك من خلال لقاء لها ببرنامج ضيفي مع الإعلامي معتز الدمرداش عبر شاشة تلفزيون قناة الشرق للأخبار.
هل تفكر نيللي كريم في الارتباط؟
وقالت نيللي كريم، في تصريحاتها: "السنجلة حلوة والجواز حلو على حسب.. واختياراتي مدمرة حياتي وأنا دلوقتي ولو لقيت الشخص المناسب هرتبط لكن بفضل يكون برة الوسط الفني وانا دلوقتي مرتاحة وبشكل كبير قافلة الباب على موضوع الارتباط".
كواليس تعاون نيللي كريم مع فاتن حمامة
أما عن تعاونها مع فاتن حمامة في مسلسل "وجه القمر" قالت نيللي كريم: "مدام فاتن حمامة في الحياة كانت شخص متفائل جدا ومثقفة وعندها خفة دم، الشخص المتفائل وبيبص لقدام بنظرة إيجابية حياته بتبقى مختلفة وبيتقبل كل الأمور الحياتية بصدر رحب، ورحت الاستديو عشان أقابل مدام فاتن حمامة لأول مرة فسألتها هو أنا كل الجرايد شتمتني بعد الفوازير ليه حضرتك اخترتيني، قالت لي أنا عارفة أنك كنتي أول مرة وكويسة، قلت أكيد هي شايفة حاجة أنا مش شايفاها، أنا اعتبر أول حاجة تمثيل مع سيدة الشاشة العربية، وبعدين عرفت أن هي كانت عايزاني وحد تاني مكنش عايزني فقالولها إحنا مش عارفين نوصل لها".
وأضافت نيللي كريم: "في مرة كان عندنا مشهد غداء ومكناش عارفين هنعمل إيه قعدونا وهو المشهد لمدام فاتن حمامة، لقيت مدام فاتن بتمسك كوباية الشاي وهي بترتعش وتعبت وهيغمى عليها مبقتش فاهمة هو تمثيل ولا بجد من كتر ما الموضوع حقيقي لحد ما لقيت حد من المساعدين بيقولي أقعدي، وقالتلي جملة خليكي طبيعية متمثليش على قد ما الكلمة سهلة على قد ما فعلها صعب".
