مديحة حمدي تنهار من البكاء أثناء الحديث عن سميحة أيوب: حاسة أنها لسه عايشة معانا ومماتتش 

تحدثت الفنانة مديحة حمدي عن علاقتها بالفنانة الراحلة سميحة أيوب، وتفاصيل مؤثرة بعد وفاة الأخيرة، موضحة أنها شاركت في غُسلها.

وقالت مديحة حمدي في خلال مقابلة تلفزيونية مع الإعلامية نهال طايل ببرنامج تفاصيل، المذاع على قناة صدى البلد 2، عن مشاركتها في غُسل الراحلة سميحة أيوب: «مقدرتش أسيبها وموقف صعب وقعدت يعني أقولها: إنتي سامعاني؟ والله بوستها من أول راسها لحد رجلها.. أنا عارفة إنك سامعاني».

وتابعت مديحة حمدي: «ساعات كنت لما أخلص شغلي وقاعدة لوحدي، فأقول: أنا قريبة مثلاً من التلفزيون، أروح أقعد مع مدام سميحة.. فساعات أنسى ويجيني خاطر أعدي عليها لكن مفيش دلوقتي مدام سميحة لكن حاسة أنها لسه عايش معانا ومماتتش».

وقالت مديحة حمدي عن سميحة أيوب: «ست بيت جدًا، تطبخ حلو قوي ومؤسسة قائمة بذاتها، تعمل شعرها بنفسها، مانيكير، باديكير، قص».

وتابعت مديحة حمدي: «مرة قعدنا ندردش مع بعض قعدنا من الساعة 7 بتتكلم، بصيت لقينا الساعة 3 الصبح، بتحكيلي سيرتها الذاتية، وأنا استمتعت جدًا ولو تقدر تعمل أي حاجة لأي حد، متتأخرش أبدًا إنها تعملها ومش من النوع اللي بيغتاب، ولا ينم».

وفيما يخص ذكرياتها مع الفنان الراحل نور الشريف، قالت مديحة حمدي: «يمكن إحنا قد بعض، بس كنت بعتبره أستاذ ولما كنا بين المشاهد يغيروا ديكور أو إضاءة أو ملابس، كنتي تستمتعي يكلمك عن كتاب قرآه، يحب التصوير، بيفهم في الإضاءة كويس جدًا.. مش أناني عشان تاخدي نورك وأول واحد ييجي للاستوديو، يكسفك بالالتزام وبحبه».