«اترميت في السجن وسبت ابني عنده شهر من غير رضاعة» .. ريهام سعيد تكشف تفاصيل تعرضها للظلم
كتب: شروق خالد
كشفت الإعلامية ريهام سعيد عن تفاصيل تعرضها للظلم خلال فترة عملها بالإعلام حتي الآن، موجهة رسالة شديدة اللهجة لكل من ظلمها أو حاول تصدير أفكار خاطئة عنها، حيث جاء ذلك عبر حسابها الشخصي بـ "إنستجرام".
وكتبت "سعيد" قائلة: "حسبي الله ونعم الوكيل في كل مفتري وفي كل افاق ساهم أنه يقضي على مجهود ناس استمر لسنين طويلة".
وتابعت حديثها: "حسبي الله ونعم الوكيل في كل واحد ساهم أنه يصدر فكرة غلط عني وعن شخصيتي، حسبي الله ونعم الوكيل في كل واحد جاب سيرتي عشان يشدني لمشكلة واطلع في الاخر بتاعة مشاكل لما يكون ليه رد فعل، حسبي الله ونعم الوكيل في كل واحد غلط فيه من غير سبب عشان كل ذنبي أني نجحت، حسبي الله ونعم الوكيل في كل واحد وقفت جنبه واتخلي عني في وقت شدة وعارفاهم بالإسم ومش هانسي، حسبي الله ونعم الوكيل في كل واحد ما يعرفنيش وقال كلمة وحشة عني، حسبي الله ونعم الوكيل في كل صحفي كتب خبر في عز أزمتي عشان يقضي على شغلي واسمي، حسبي الله ونعم الوكيل في الي اتسبب أن أطفال ماتت كل ما كان البرنامج بيقف، حسبي الله ونعم الًوكيل في كل واحد كتب بوست شتيمة عن جهل لما سمع وماشافش المهم أن كل دول فاهمين أنهم انتصروا غلطانين».
كما أضافت "سعيد": "أنا صحيح اعتزلت لكن أنتوا كل يوم بتعرفوني اد ايه أنا ناجحة ومهمة وشاطرة، عرفتوني قيمة الحياة الحقيقية وهي الزوج والعيلة والأولاد عرفتوني أن المتعة الحقيقية في طاعة الله وعبادته شكرا لكن أوعوا تستهونوا بحسبي الله ونعم الوكيل والله الحق راجع والأذي راجع تالت ومتلت .. أما بقي اللي رماني في السجن ظلم ده حسابه عند ربنا عسير أنا أم سبت ابني عنده شهر من غير رضاعة من غير ما أعمل أي حاجة".
واستكملت: "ليه بكتب الكلام ده دلوقتي عشان لا أملك غير الدعاء وعندي يقين أن حقي راجع .. أنا عملت كتير بس مكنتش مستنية شكرا بس مكنتش مستنية برضو افتري وأذي كدة .. خلوا بالكوا في ناس وحشة كتير أوي أوي معدومة الضمير بس ربنا كبير أوي أوي .. الحمد لله".
واستطردت: "كتبت الكلام ده لأني تعبت من الافتري اللي في كل حتة والمصلحنجية اللي كانوا حواليه اللي فص ملح وداب دلوقتي والناس اللي كسبت من ورايا ملايين ورموني في الأخر وخربوا بيتي".
أردفت: "ماتصدقوش كل حاجة تتكتب، من أسبوع في صحفي قال أني كدابة وافاقة وأني عايشة في دور الضحية وهو عمره ما شافني ولا قابلني ولا شاف مني حاجة وحشة .. ان شاء الله تصحي من النوم تلاقي الصراصير ماشية علي وشك زي ما كان بيحصل لي عشان تعرف أني أقوي من أي حد وعمري ما قلت أني ضحية بإذن الله بإذن الله ربنا يعرفك أنك ظالم وغلطان وأني اتعذبت في حياتي بسبب أمثالك في جهنم ان شاء الله".
وفي سياق متصل، اختتمت ريهام سعيد حديثها قائلة: "ماتصدقوش أي حاجة تنكتب أو تتقال على حد امشوا بكتاب ربنا .. عارفة أن معنديش ضهر ولا علاقات ولا نفوذ لكن ليا رب اسمه الكريم العادل القهار .. أنا ولا أخدت صور من على موبايل ولا شتمت تخان ولا خطفت عيال ولا خليت التعلب يعيط، أنا قضيت عمري في خدمة الناس اللي هما أهلي يكفيني فخرًا اني عمري ما كذبت ولا كنت بوشين ودائما كنت بقول الحق يكفيني أني لغاية دلوقتي محدش عرف يحقق اللي أنا حققته من غير واسطة ولا إمكانيات .. أنا عمر ما حد طلب مني حاجة ومعملتهاش بحب واتقا .. يا رب يا رب يا رب أشوف حقي راجع من كل اللي ظلمني قبل ما أموت".
View this post on Instagram
وكانت الإعلامية ريهام سعيد، قد أعلنت قرار اعتزالها النهائي من تقديم البرامج مرة أخرى وعودتها لحلمها وهو التمثيل الذي تركته عام 2015 من جديد، وذلك في يوليو الماضي.
