ريهام سعيد: عمري ما هسامح حسن شاكوش.. وحاسة إني هموت قريب

وجهت الإعلامية ريهام سعيد، رسالة لجمهورها عبر حسابها الخاص بموقع التواصل الاجتماعي «فيسبوك»، شاكية من قرارات إيقافها عن مزاولة المهنة بسبب أخطاء تجدها لا تقارن بالتشكيك في معراج الرسول الكريم.

وقالت ريهام سعيد: «أقسم بالله كل حرف هاكتبه صادق و من قلبي، أنا حاسه إني هموت قريب عشان كده هابعد عن السوشال ميديا عشان اقعد مع أولادي أكتر وقت ممكن خصوصا ابني الصغير، يمكن سحر يمكن اكتئاب ويمكن حقيقي، غالبا إحساس الظلم كان بيقتلني بالبطيء في يوم من الأيام الدنيا قامت علي عشان ثعلب، أما المعراج وإنكارها عادي، تامر أمين يغلط في الصعايدة قاصد أو مش قاصد يتوقف ٣ شهور، لكن أنا أعمل أكبر حملة للسمنة وأعالج آلاف من السمنة وعمليات ببلاش ويفتروا علي ويقولوا إني قلت ان ريحتهم وحشه واتوقف سنة، فتاة المول ولا تحرش ولا نيلة وأجيب فيديو وهي معه، محدش يشوفه واتحاكم وأدفع اللي ورايا واللي أدامي لسما المصري عشان تتنازل لأن هي اللي زقاها عليه».

وأضافت: «لو مت أنا مش مسامحة، مش مسامحة أي حد قال عليه كلمة واحدة مش حقيقية أو على السمع، مش مسامحة أي صحفي كتب عني كلمة ظلم مش مسامحة أي واحد كتب كومنت موت بيها أطفال القلب، كفايه إن أي حاجه الإعلام بيتكلم فيها دلوقتي أنا متكلمة فيها من عشر سنين».

وتابعت: «مش مسامحة ولا هسامح، مش مسامحة اللي بتسحر لي كل شوية، مش مسامحة حسن شاكوش واللي عمله في أولادي، مش مسامحة أي حد ساهم في خراب بيتي وضياع مجهود سنين ومش مسامحة أي حد أنا معرفوش ضدي وبيحاربني وأنا مش عارفة، المهم إني أجهز للقاء ربنا أعوض الصيام وأصلي كتير واتصدق وأدعي، أدعوا لي أنتم كمان ربنا يغفر لي. ريهام بتجيب مشاكل طب وراحت فين المشاكل لما قعدت في البيت؟ آخر حاجه هاوجحهها للريس أنا لو مت وصيتي أولادي يعرفوا أنا حققت و عملت إيه لأن أكيد حضرتك مش عارف برضوا، أنا أولادي اتعذبوا ورايا في المحاكم والقضايا، أنا ابني كان عنده شهرين زارني في السجن، أنا بهدلت أهلي معي عشان ولا حاجه، كنت فاهمة إني هصلح الكون».

جدير بالذكر أن ريهام سعيد، كانت قد  قررت اعتزال العمل الإعلامي والعودة إلى التمثيل، مكتفية بما قدمته في مجال تقديم البرامج التليفزيونية.