حسام حسن السبب.. تعليق رضا عبدالعال على تعادل منتخب مصر وغينيا بيساو | فيديو
كتب: محمود جودة
علق الإعلامي والمحلل الرياضي رضا عبدالعال على تعادل منتخب مصر مع غينيا بيساو بنتيجة (1-1)، اليوم الإثنين، في التصفيات المؤهلة لكأس العالم 2026.
رضا عبدالعال
وقال رضا عبدالعال في تصريحاته: "بكل المقاييس احنا المفروض نكسب النهاردة، فرقة غينيا بيساو مبيعرفوش يعملوا باصتين على بعض، وكونهم يجيبوا فينا جون يبقى في خلل وحاجة مش طبيعية".
وأضاف: "إمام عاشور كان المفروض ميلعبش النهاردو وميسافرش أصلا بعد اللي عمله في ماتش بوركينا فاسو، بأنه يخرج وميسلمش على حسام وإبراهيم، وطبعا هم عملوا كدة عشان خايفين من جماهير الأهلي، لكن اللي حصل خلى هيبة المنتخب راحت، وبما أن حسام وإبراهيم قبلوا ده يبقى شكلهم جايين ياكلوا عيش".
وتابع: "كان من الأولى على حسام حسن إشراك ناصر ماهر اللي عمل فرصتين في الشوية اللي نزلهم، بدل ما ينزل إمام عاشور، وكمان مصطفى فتحي كان هيبقى أفضل من إبراهيم عادل".
وقال رضا عبدالعال إن محمد صلاح هو اللي أنقذ حسام حسن اليوم بإحراز هدف التعادل أمام غينيا بيساو، رغم أن تصريحاته السابقة كانت تهاجمه.
وتابع: "مش عارف ليه حاطط راسك براس صلاح، وكنت بتقول عندي 20 لاعب أحسن منه، لكن هو اللي أنقذك النهاردة، وكنت عايز تغيره في الماتش بس هو مرضيش وخلى شكل وحش قدام مصر كلها، لأن صلاح مينفعش يتغير إلا لو مصاب".
وقال رضا عبدالعال إن حسام حسن كان عليه الدفع باللاعب عمر كمال عبدالواحد بدلا من محمد هاني في مباراة اليوم، ومشاركة مصطفى شوبير بدلا من محمد الشناوي، بالإضافة إلى ضرورة مشاركة مصطفى فتحي أو محمد شريف، بدلا من أحمد أمين أوفا أو إبراهيم عادل.
وأكد رضا عبدالعال أن حسام حسن يسأل عن إهدار نقطتين اليوم أمام غينيا بيساو، لأنه منتخب متواضع للغاية ولا يتميز إلا في أجسامهم الكبيرة، وكان من الممكن أن نحقق الفوز عليه بسهولة.
واختتم رضا عبدالعال تصريحاته، التي قالها عبر قناته الرسمية على "يوتيوب" بأن منتخب مصر لأول مرة في تاريخه يخوض تصفيات كأس العالم مع فرق سهلة و"مبتعرفش تلعب"، لكن في النهاية التعادل أفضل من الخسارة.
