شمس: مش ههين نفسي على كبر وأقول للناس شغلوني

كشفت الفنانة شمس سبب قلة أعمالها الفنية، وعدم دخولها عالم "تيك توك" وظهورها في فيديوهات بث مباشر لتلقي الدعم، كما يفعل عدد من زملائها الفنانين الذين ابتعدوا عن الأضواء.

وقالت شمس خلال مداخلة هاتفية مع برنامج "تفاصيل" من تقديم نهال طايل عبر قناة "صدى البلد": "أنا مش ههين نفسي على كبر وأنزل أقول للناس شغلوني، أنا كنت زمان مش بكلم حد مكنتش بكلم أستاذ جلال الشرقاوي ولا أستاذ حسين كمال ولا أستاذ محمد فاضل ولا أستاذ مجدي أبو عميرة، أنا حد كان يكلمني يقولي في دور كذا، أنا مش بجري ورا الدور وإني أكون موجودة من الجلدة للجلدة، أنا لازم الدور يشدني وأحبه".

"عندي حساب على تيك توك لكن مش متفاعلة خالص مش عارفة اتأقلم مع الموضوع ده، أول فيديو عملته كان تهريج مع المساعد بتاعي جاب نص مليون مشاهدة".

وتابعت شمس: "محدش في الأزمات والظروف اللي إحنا فيها مش محتاج الدعم اللي الناس بتاخده على تيك توك، العيب فيا أنا مش عارفة أتعامل مع التليفون أنه كاميرا أنا متعودة على الكاميرات والإضاءات، مش حاسه إني هلاقي نفسي".

وأضافت شمس: "بتكلم عن الدعم المادي بلدنا بتمر بظروف قاسية جدا وارتفاع الأسعار وكل حد عنده التزامات، ودي حاجة سهلة إنتي قاعدة في بيتك فاتحة تليفونك هتهرجي هيجيلك فلوس، لكن أنا معرفتش استخدم شهرتي".