محمد سامي: تامر حسني سبب كل اللي أنا فيه وإداني فرصة كانوا مستكبرينها عليا
كتب: نسرين إبراهيم
استعاد المخرج محمد سامي، ذكرياته مع مشواره الفني والصعوبات التي واجهها، مؤكدا أن النجم تامر حسني صاحب الفضل لكل ما وصل له من نجاح وكان أكبر داعم له وأول من أعطاه الفرصة لإثبات موهبته.
ونشر سامي، صورة له مع تامر حسني من أرشيف الذكريات، عبر حسابه الرسمي على إنستجرام، وعلق عليها، قائلا: "ولَا تَنْسَوُا الْفَضْلَ بَيْنَكُمْ".. وأنا قاعد إمبارح في التصوير افتكرت الرحلة والشقي والتعب من أول عمل لحد العمل اللي بصوره دلوقتي وافتكرت صعوبة الحصول علي فرصة عشان الواحد يثبت نفسة و يحقق أحلامه".
واستكمل: "فطبعا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي، تامر قدملي كل الدعم والحب والامكانيات اللي خلتني اثبت نفسي وبالذات في وقت كان صعب الشباب ياخد في الدراما فرصة بحجم مسلسل آدم".
وتابع: "فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه وبصلي مرة والظروف كلها ضدي وكنت حاسس وانا بحضر انهم هيجيبو حد غيري وقاللي ده مسلسلك وهتعمله وهتنجح وهتنجحنا معاك، حتي طريقته المتواضعة وهو بيقوللي مسلسلك كأني عامل تسع مسلسلات قبله تحسس الواحد بنفسه وأهميته".
وأضاف: "أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني".
View this post on Instagram
