«اتكتبت واتلحنت في 5 ساعات».. أكرم حسني يكشف عن كواليس كتابة «تيجي نسيب» لـ أنغام
كتب: نسرين إبراهيم
كشف الفنان أكرم حسني لأول مرة عن كواليس كتابته أغنية "تيجي نسيب" للمطربة أنغام، في منشور طريف على انستجرام تضمن قصة مضحكة ومفصلة.
نشر أكرم حسني مقطعًا للملحن إيهاب عبد الواحد يغني "تيجي نسيب" على الجيتار ويسجلها على محموله، وكتب الممثل "يوم التلات 2 نوفمبر 2021.. الساعة أربعة الفجر.. قام ايهاب عبد الواحد عشان يمشي بعد سهرة طويلة عندي في البيت ايهاب مسابش فيها الجيتار من ايده هو بيغني وكلنا بنغني معاه".
وأضاف "بعد ما كله مشي جاتلي فكرة أغنية " تيجي نسيب " فـ كتبتها و خلصتها علي الساعة ستة الصبح، وهموت وأكلم ايهاب عشان يجيلي يسمعها ويلحنها بس مكسوف أكلمه .. الراجل لسه ماشي من عندي من ساعتين وأكيد ملحقش ينام.. الساعة سبعة صباحا بعد ما قدرت امسك نفسي لمدة ساعة كاملة اتصلت بيه ف رد بصوت غرقان في النوم".
ودار الحوار بين أكرم وإيهاب كالآتي:
أكرم: صباح الفل يا بوب.. صحيت ؟ ( سؤال فيه كمية استهبال مش طبيعية )
ايهاب: لا لسه.. أنا نايم من ساعتين بس.. في حاجة؟
أكرم: لا يا حبيبي مفيش .. خلاص اصحي وكلمني
الساعة سبعة و ربع اتصلت تاني
أكرم : ايه يا بوب صحيت؟
إيهاب ( بعصبية مكتومة قدرت احسها): اكرم انت كويس ؟
أكرم: أه يا معلم تمام بس أصلي كتبت حاجة كده وحاسس إنها حلوة ف عايز اسمعهالك
إيهاب ( بحماس): لا إن كان كده هفوق والبس وأجيلك
أكرم : يالا مستنيك
الساعة سبعة ونص اتصلت بيه
أكرم: بوب قهوتك ايه؟
إيهاب (بعصبية): أكرم .. والله العظيم بفوق وهاجي
أكرم: ماشي يا حبيبي مستنيك
الساعة تسعة إيهاب وصل
أكرم: بوب أنا كتبت أغنية فرحان بيها اوي
إيهاب: طب مش كنت بتسألني قهوتي إيه ؟
أكرم (بتجاهل): بص يا بوب الاغنية بتقول " تيجي نسيب .. تيجي نجيبها في النصيب.. تيجي نقول محناش لبعض ويبقي بعد تغيب وأغيب ............ "
إيهاب (باندهاش) مين اللي كاتب الكلام ده ؟
أكرم : انا
إيهاب (بنفس حالة الاندهاش): أنا قهوتي سادة
أكرم: حالا
وتابع أكرم: "من الساعة تسعة للساعة اتناشر إيهاب مبيعملش حاجة غير إنه ماسك الجيتار وعمال يجرب جمل لحنية في دماغه ويطلب قهوة سادة.. الساعة اتناشر وعشر دقايق كان خلص اللحن وبيسجله ( بصوا الساعة اللي ورا عشان تتأكدوا ) ومكانش يعرف اني لما قولتله وهو ماشي الفجر عايزين نكررها قريب انها هتبقي قريب أوي كده".
وأكمل القصة: "الاغنية راحت للموزع الكبير صاحب اللمسات السحرية حسن الشافعي عشان يحط بصمته عليها وتطلع بالشكل اللي انتوا سمعتوه.. اغنية تيجي نسيب اتكتبت واتلحنت في خمس ساعات واستهلكت نص كيلو بن وسط محوج، بس عشان طالعة من القلب ولحنها ملحن عبقري بيحس بكل كلمة ويترجمها لـ لحن ربنا كرمنا بأن اللي يغنيها تبقي فنانة معجونة احساس وفن وحلاوة صوت وحضور طاغي ومكانة كبيرة في قلوب جمهورها في كل حتة في الوطن العربي.. انغام".
View this post on Instagram
