أسما شريف منير عن علاقتها العاطفية: «عشت فترة طويلة في علاقات مرهقة ومليانة أذى نفسي»
كتب: متابعات
كشفت أسما شريف منير عن كواليس أزمتها مع علاقاتها العاطفية، بعدما حذفت جميع صورها على حساباتها الرسمية بمواقع التواصل الاجتماعي المختلفة.
علاقات مرهقة وأذى نفسي
ونشرت أسما شريف منير، صورة جديدة لها، عبر حسابها الشخصي بموقع التواصل الاجتماعي تبادل الصور والفيديوهات إنستجرام، معلقة: «عشت لفترة طويلة في علاقات مش مرتاحة فيها، العلاقات كانت مرهقة ومليانة أذى نفسي، دايمًا حاسة إن في حاجة ناقصة، وفي حاجة غلط، العلاقات كان فيها تضحيات كبيرة من طرف واحد، الحب والشغف اللي كنت بحلم بيهم مش موجودين».
وأضافت: «كنت دايمًا بقول لنفسي مش لازم كل حاجة تكون مثالية، المهم إني مرتاحة حتى لو موجوعة، ما هو ده الحب اللي أعرفه، مش الحب عذاب برضه؟، بس في نفس الوقت، كل مرة بشوف علاقة مليانة حب وتفاهم حقيقي، كنت بحس إني بتنازل عن حاجات مهمة في حياتي لحد ما في يوم، قررت أقعد مع نفسي وأسأل.. هل الراحة كفاية؟، هل المفروض أقبل بعلاقة مفيهاش توازن والإحساس اللي أنا أستحقه بس عشان ده اللي أعرفه؟».
واستكملت: «بعد التفكير، قررت إني مش هتستمر في علاقة مش مريحة لمجرد إني خايفة أبقي لوحدي، قررت إني أستحق علاقة فيها حب حقيقي، دعم، وتفاهم».
واختتمت: «الدرس اللي إتعلمته كان واضح، متقبلش علاقة متوسطة بس عشان الخوف، إحنا نستحق إننا نعيش علاقة مليانة حب وتقدير بجد».
