كريم الشناوي: معرفش أعمل زي محمد سامي وهو ميعرفش يعمل زيى

كشف المخرج كريم الشناوي عن رأيه فى الأعمال الأكثر تريند مثل نجاح مسلسل "إش إش" للمخرج محمد سامي، فى المقابل حقق مسلسله "لام شمسية" اهتماما واسعا وتأثيرا كبيرا فى الشارع العربي. 

كريم الشناوي: «إش إش» أعلى مشاهدة من «لام شمسية» 

وقال كريم الشناوي، فى لقاء ببرنامج "ضيفي مع" للإعلامى معتز التوني : "لام شمسية" مش أعلى مشاهدة "إش إش" الأعلى مشاهدة، بس أنا مش عايز أبقى الأعلى مشاهدة مش فارق ليا، الموضوع ليه علاقة بتعريفنا إحنا عايزين نعمل إيه، لما يبقى في مسلسل تاني أعلى مشاهدة أنا دي مش خناقتي، النوعية دي لازم تبقى موجودة في ناس بتحبها وعمري ما بشوف أن المنع حل في السوق وأستاذ محمد سامي أشطر واحد في الحتة دي، أنا معرفش أعملها زيه وهو ميعرفش يعمل اللي أنا بعمله". 

وأضاف: "السوق لازم يبقى فيه كل حاجة ولو أنا مهتم إني أبقى الأعلى مشاهدة هاخد قرارات مختلفة، بس أنا مباخدش قراراتي إني أبقى الأعلى ممكن أبقى مهتم إني أكون الأهم وإني أعيش أطول لكن في الآخر كل حد بيرتاح في منطقة، والأصل في السوق التنوع وفي الآخر القرار عند الجمهور لو مش عايز عمل مش هيتفرج عليه فمفيش منتج هينتج تاني، والسوق السنة دي كان فيه تنوع وتغيير في الجمهور عايز إيه ودي حاجة بتتغير طول الوقت".