جمال يوسف: خيانة الصحة كانت الأصعب..وأشرف زكي مش نقيب عادي ده سند لكل الفنانين

في لقاء تلفزيوني كشف الفنان جمال يوسف عن محطات إنسانية وفنية مؤثرة في حياته، تحدث خلالها عن أسرته، وبداياته مع الفنان محمد صبحي، وتجربته القاسية مع المرض، كما وجه انتقادات حادة للسوشيال ميديا، ورد على تصريحات الفنان السوري سلوم حداد.

 الأسرة أولًا: صداقة قبل الأبوة

قال جمال يوسف إن علاقته بأبنائه قائمة على الصداقة لا الأوامر، مؤكدًا أن مرضه السابق قرّبه أكثر من أسرته:"أنا أحب أولادي جدًا، هم حياتي، وبعد التجربة التي مررت بها، أصبحت علاقتنا أقوى، الحمد لله مترابطون ومتحابون."

 محمد صبحي.. الأب والمعلم

استرجع جمال يوسف بداياته في سن الـ16 مع المخرج والفنان الكبير محمد صبحي، وقال:"كنت مبهورًا بشخصيته، تعلمت منه الانضباط والاحترام. كنا نسميه المدرسة الفنية العسكرية، واليوم أدرك كم استفدت من هذا الانضباط في حياتي وأبوّتي."

 هجوم على السوشيال ميديا: "مصر أكبر من كده"

انتقد يوسف الفوضى التي تشهدها مواقع التواصل، مؤكدًا:"أي حد ممكن يشتم غيره دلوقتي، وصورتنا كدولة بتتشوه. مصر كبيرة جدًا مش زي ما بيظهر على السوشيال ميديا، خصوصًا صورة المرأة المصرية."

وأضاف:"الداخلية بدأت تتحرك، لكن كان لازم يحصل من زمان. إحنا تعبنا عشان نربي أولادنا تربية محترمة، مش لازم أي ترند يدمّر اللي بنبنيه."

 "خيانة الصحة": عام في غيبوبة

تحدث عن أصعب محطات حياته، حينما أصيب بالسرطان:خيانة الصحة كانت الأصعب... سنة كاملة في غيبوبة بيتية. كان لازم أقاوم عشان أولادي. ما فكرتش مين جنبي ومين لا، كانت معركة بيني وبين نفسي."

إشادة بأشرف زكي

أثنى على الدكتور أشرف زكي، نقيب المهن التمثيلية:"لو اتصلت به الساعة 3 الفجر هيرد عليك وينزل، ده مش نقيب عادي، ده سند لكل الفنانين."

زوجته: العالمة الدينية والطبيبة

أشاد بزوجته الدكتورة حنان محمد، قائلًا:"هي بتدي دروس دينية في السيدة زينب ونفيسة، وأنا بصلي وملتزم. الناس بتستغرب إنها زوجة ممثل، لكن أنا بتعلّم منها كل يوم."

 180 عملًا.. ندم واعتزاز

كشف يوسف عن مشاركته في أكثر من 180 عملًا دراميًا، لكنه أبدى ندمه على مسلسل واحد:"كنت عامل صبي عالمة... بعده واحد كبير في السن قالي (بلاش كده تاني)، الكلمة دي جرحتني جدًا، وندمت على الدور رغم حماسي وقتها."

أما عن أقرب أدواره فقال:"اعتز جدًا بالعمل مع نور الشريف، وتجربتي في (بنت بنوت) مع مي عز الدين كانت مميزة."

 واقعة كارفور: "أنا ممثل.. فاخترت الصمت"

علّق على الجدل حول مشادة في كارفور قائلًا:"اللي حصل مش خناقة... كنت مع بنتي، وراجل قاللي (آه أنتم أسياد الناس)، فضّلت ساكت عشان ما أتهزش قدام بنتي. أي رد عنيف كنت هتتصور وأطلع ترند سلبي."

 رسالة لسلوم حداد: "تعال شوف شبابنا على المسرح القومي"

رد على تصريحات الفنان السوري سلوم حداد التي اعتبرها إساءة للفن المصري:
"أنا اشتغلت مع كبار المخرجين السوريين زي حاتم علي، وشافوا إزاي المصريين بيحترموا الكل. الفن المصري دايمًا كان جسر التواصل، واللي مش معروف في مصر، مش معناه إننا بنقلل منه."

قال يوسف إنه اختار الهدوء في مواجهة الإهانات:
"أول ما اشتغلت كنت مليان حماس، بس دلوقتي مش هرد على كل حد يشتمني. مش لازم كل حاجة تتحول لترند."