والد الطفل عمر يكشف عن تفاصيل اعتداء ابن محمد رمضان على نجله
كتب: سماح غنيم
كشف محمد سالم، والد الطفل عمر، 11 سنة، عن تفاصيل اعتداء الطفل علي، ابن الفنان محمد رمضان على نجله بضربه والتعدي عليه وإصابته بكدمات، خلال تواجدهما في نادي شهير بمدينة 6 أكتوبر.
وقال سالم، خلال تصريحات تليفزيونية: الموضوع عبارة مشادة بين أطفال، الموضوع بسيط، والطبيعي له طرق للحل، لكن للأسف المشادة اتقال فيها كلام من عينة أنتوا متعرفوش أنا مين؟ وأنا ابن مين؟
وأضاف: الأطفال كانوا بيلعبوا عند الألعاب المائية عند الزحليقة، فحد تقريبًا خبط في ابن الشخص اللي أنا مدعي عليه، ابني تدخل عشان يحوش بين الاثنين، فالوالد قاله انت متعرفش أنا ابن مين؟ وبعد كده حصل تلاسن وتجاذب بالأيدي.
وتابع: الموضوع خلص على كده، لكن على ما يبدو إن الطفل الثاني اتصل بوالده، بعدها ابن الشخص ده جري على ابني، ومسك الموبايل وصور ابني تقريبا كان مشغل فيديو كول وبيشاور على ابني وأصحابه وبيقول هما دول.
وأكمل: بعدها الولد تتبع ابني وحجز في الحمام، قفل عليه الباب، مش عارف دي فكرة الولد الصغير، أنا هسيب الموضوع للنيابة، حد من أصدقاء ابني فتح له الحمام، وخرجوا لقوا الفنان محمد رمضان غاضب جدًا.
واختتم: محمد رمضان بدأ يوبخ الأولاد، وخدهم وادهم لابنه وبدأ بيقولوا مين فيهم اللي ضربك؟ وبعدها همس في أذن ابنه، وبعدها ابنه ضرب ابني بالقلم على وشه، وفي شهود بهذا الكلام، وحاش ابنه وراه، أنا لجأت للقضاء من أجل الحصول على حق ابني.
