هالة الدمراوى تكتب ..الجمهور .. و المشهور .. و مقياس الغرور ! 

بداية لابد ان نعرف ان الفن حاجه و النجوميه حاجه تانيه خالص ! 
يعنى لدينا الاف الفنانين و الفنانات المعروفين و المعروفات .. هناك ايضا من نعرفهم شكلا فقط .. و هناك من نعرفهم شكلا و اسما .. هناك الممثل و الممثل المعروف .. هناك الفنان فقط و هناك الفنان الكبير و القدير .. و بعد ما تمشى شويه محترمين كدة تلاقى النجم .. و فى الاخر بقي تلاقى السوبر ستار و الميجا ستار .. و ازعم ان هؤلاء فى مصر يعدون علي اصابع اليد الواحدة ! 
و السوبر ستار لا يقاس دوما حجمه بمقدار موهبته او اعماله بقدر ما هى تركيبه كدة و خلطه خاصه جدا من الموهبه و الاعمال و القبول و الجماهيريه ! 
يعنى تلاقي نفسك ساعات امام اداء تمثيلي او غنائي جبار لفنان من الطراز الجامد بلا جدال .. بس مالوش نصيب كافى من القبول و الجماهيريه .. يعنى هلته و طلته مش عشرة علي عشرة ! و هذا يخضع فى المقام الاول لتوفيق المولي عز و جل .. يعنى لا شغل كتير ولا فتاكه و لا ظهور و لا نفسنه .. هذة هى المنطقه الخاصه جدا التى يقبع فيها السوبر ستار .. هو ناجح فى الفن و فى المجتمع و فى حياته .. هو لا يصلك منه الا ما يريدة هو .. و هذا جزء ايضا من خصوصية النجاح ! 
اللي فى المكانه دة بقي ماذا يطلب منه الجمهور .. و لماذا يتعمد بعض المتعاملين معه اتهامه بالغرور و التعالي و العزله و شوية التهم المعقدة دة ؟ 
انا اتمنى معرفه مقياس الغرور ايه بين الجمهور و المشهور ؟ 
يعنى هيكلم الناس كلها فى التليفون و يرد عليهم فى الواتس اب ! و لا هيسلم علي كل فرد بيدة ! ولا هيشرح و يبرر و يؤكد و ينفى كل ما يقع من سيادتك امام عينه ! دة اذا كان الناس العاديه يا سيدى منك ليه مش بترد علي تليفوناتها و لا بتسأل فيك و ممكن تطنشك لما تشوفك او تعمل نفسها مش شايفاك و عينك فى عينها ! 
قبل ما نهاجم رموز و نجوم لهم وزنهم و حجمهم .. علينا ان نضع فى الاعتبار عشرات السنوات الماضيه التى ظل هؤلاء طوالها نجوما ورواد و سباقين و ثابتين علي عرش النجوميه ..
  ما ينفعش( بقي) نقول ان الفنان الفلانى بعمله الناجح الاخير غطي علي تاريخ بأكمله من النجاحات لنجم ظل فى السماء لمدة لا تقل عن ربع قرن مثلا او تزيد !!!
المقارنه كدة كيديه و عبثيه و غير منطقيه !
إحترموا نجومكم المصريين .. كما يحترمهم فى العالم كله المتخصصين و المهنيين !
إفصلوا بين النفسنه من حد و بين التقييم اللي بجد !